படத்தைப் பார்த்து பயந்து ஓடிய மக்கள் : வரலாற்றில் இடம்பிடித்த 3 ஹாரர் படங்கள்
ADDED : 9 hours ago
வழக்கமாக பேய் படங்கள் பார்த்தால் வீட்டிற்கு வந்த பிறகு அதன் தாக்கம் தெரியும். அல்லது பேய் வரும் காட்சிகளில் மட்டும் தியேட்டர் பீதியான சூழல் நிலவும். ஆனால் தியேட்டர்களில் திரையிடப்பட்ட போது, அவற்றில் இடம்பெற்ற காட்சிகள் மற்றும் பின்னணி ஒலியின் தீவிரத்தால் மக்கள் அலறியடித்து ஓடிய, மயக்கமடைந்த மற்றும் வரலாற்றில் தடம் பதித்த 3 ஹாரர் திரைப்படங்கள் இவை தான்.
1. தி எக்ஸார்சிஸ்ட் (The Exorcist - 1973)
இயக்கம் : வில்லியம் பிரைட்கின் (William Friedkin)
ஹாரர் திரைப்பட வரலாற்றின் ஆகச்சிறந்த படைப்பாகக் கருதப்படும் படம் இது. பேய் பிடித்த 12 வயது சிறுமி ரெகன் (Regan) மற்றும் அவளை மீட்கப் போராடும் பாதிரியார்களின் கதையை மையமாகக் கொண்டது.
திரையரங்குகளில் நடந்த அதிர்ச்சிகள்
1973-ல் படம் வெளியான போது தியேட்டருக்கு வெளியே மைல் கணக்கில் மக்கள் வரிசையில் நின்றனர். படம் தொடங்கிய சில நிமிடங்களிலேயே சிறுமி தன் தலையை 360 டிகிரி திருப்புவது, பச்சை நிறத்தில் வாந்தி எடுப்பது மற்றும் கெட்ட வார்த்தைகளில் பேசுவது போன்ற கொடூரமான காட்சிகளைக் கண்டு மக்கள் உறைந்து போயினர்.
அமெரிக்கா மற்றும் லண்டனில் பல தியேட்டர்களில் பார்வையாளர்கள் அலறி அடித்துக் கொண்டு வெளியே ஓடினர்; சிலர் பயத்தில் மயங்கி விழுந்தனர். பதற்றத்தில் ஏற்பட்ட நெஞ்சுவலி மற்றும் வாந்தி காரணமாகத் தியேட்டருக்கு வெளியிலேயே பல ஆம்புலன்ஸ் வாகனங்கள் (Ambulances) தயார் நிலையில் நிறுத்தப்பட்டிருந்தன. அயர்லாந்து போன்ற சில நாடுகளில் மத உணர்வுகளைப் புண்படுத்துவதாகவும், மக்களை அளவுக்கு அதிகமாகப் பயமுறுத்துவதாகவும் கூறி படத்திற்குத் தடையும் விதிக்கப்பட்டது.
2. தி பிளேர் விட்ச் புராஜெக்ட் (The Blair Witch Project - 1999)
இயக்கம்: டேனியல் மைரிக் & எட்வர்டோ சான்செஸ்
மேரிலாந்தில் உள்ள ஒரு காட்டில் வாழும் 'பிளேர் விட்ச்' என்ற சூனியக்காரியைப் பற்றி ஆவணப்படம் எடுக்கச் செல்லும் 3 கல்லூரி மாணவர்களின் கதையை விவரிக்கும் 'Found Footage' பாணித் திரைப்படம்.
திரையரங்குகளில் நடந்த அதிர்ச்சிகள்
இந்தப் படம் வெளியான போது, காணாமல் போன 3 மாணவர்கள் எடுத்த உண்மையான வீடியோ கேசட் நமக்குக் கிடைத்துள்ளது என்ற ரீதியில் விளம்பரம் (Viral Marketing) செய்யப்பட்டது. மக்கள் அதை நிஜம் என்றே நம்பி திரையரங்குகளுக்கு வந்தனர். கையில் பிடித்து ஆட்டப்படும் கேமரா (Shaky Camera) பாணியில் எடுக்கப்பட்டதால், திரையரங்கின் பெரிய திரையில் அதைப் பார்த்த மக்களுக்குக் கடும் தலைச்சுற்றல், மயக்கம் மற்றும் குமட்டல் (Motion Sickness) ஏற்பட்டது.
இரவில் காட்டில் கேட்கும் விசித்திரமான சத்தங்களும், இறுதியில் மாணவர்கள் மர்மமான முறையில் காணாமல் போவதும் பார்வையாளர்களை உறைந்து விடச் செய்தது. திரையரங்குகளில் இருந்து பாதியிலேயே பயந்து ஓடிய பலர், 'இந்த வீடியோவை எங்களால் பார்க்க முடியாது' எனக் கூறி டிக்கெட் பணத்தைத் திரும்பக் கேட்ட சம்பவங்களும் நடந்தன.
3. தி கான்ஜுரிங் (The Conjuring - 2013)
இயக்கம்: ஜேம்ஸ் வான் (James Wan)
உண்மைச் சம்பவங்களை அடிப்படையாகக் கொண்டு, பேய் ஆராய்ச்சி தம்பதிகளான எட் மற்றும் லோரெய்ன் வாரன் சந்தித்த ஒரு பயங்கரமான வீட்டின் பின்னணியில் எடுக்கப்பட்ட படம்.
திரையரங்குகளில் நடந்த அதிர்ச்சிகள்
நவீன கால சினிமாக்களில் பார்வையாளர்களைத் திரையரங்கில் கூச்சலிட வைத்த படம் இது. இதில் பயன்படுத்தப்பட்ட பின்னணி இசை, கைதட்டும் சத்தம் (Clap Game) மற்றும் எதிர்பாராமல் வரும் 'ஜம்ப் ஸ்கேர்' (Jump Scares) காட்சிகள் மக்களைப் பெரும் பீதியில் ஆழ்த்தின. அமெரிக்காவில் இப்படத்தைப் பார்த்த பல பார்வையாளர்கள் பயம் தாங்க முடியாமல் பாதி படத்திலேயே தியேட்டரை விட்டு வெளியேறினர்.
இந்தியாவில் ஒரு தியேட்டரில் இப்படத்தைப் பார்த்த 65 வயது நபர் ஒருவர், படத்தின் தீவிரமான பயம் காரணமாக மாரடைப்பு ஏற்பட்டுத் தியேட்டரிலேயே உயிரிழந்த அதிர்ச்சி சம்பவமும் நிகழ்ந்தது. இப்படத்தைப் பார்த்துவிட்டு வீட்டிற்குச் சென்ற ரசிகர்கள் பலர், இரவில் தனியாகத் தூங்குவதற்கோ அல்லது வீட்டின் விளக்குகளை அணைப்பதற்கோ பயந்ததாக சமூக வலைதளங்களில் பதிவிட்டனர்.