துணை இயக்குனர் சரவணபாபுவை லஞ்ச ஒழிப்பு போலீசில் சிக்க வைக்க திட்டமிட்டு, அவரது அலுவலகத்தில் ரூ.2.50 லட்சம் பணம் வைத்து சதி செய்ததாக, தீயணைப்பு துறையைச் சேர்ந்த சிலர் மீது வழக்குப்பதிவு செய்யப்பட்டது.

இச்சம்பவத்தில் தீயணைப்பு வீரர்கள் ஆனந்த், மூர்த்தி, முருகேஷ் மற்றும் பணத்தை வைத்த விஜய், அவருக்கு உதவிய முத்து சுடலை ஆகியோர் கைது செய்யப்பட்டனர்.

முக்கிய குற்றவாளியான திருப்பூர் தீயணைப்பு அலுவலர் வீரராஜ் தற்போது தலைமறைவாக உள்ளார். அவரை விசாரணைக்கு ஆஜராக சம்மன் அனுப்பியும் ஆஜராகவில்லை. மேலும் அவர் முன் ஜாமின் கோரி உயர்நீதிமன்றம் மதுரைக்கிளையில் தாக்கல் செய்த மனுவும் தள்ளுபடி செய்யப்பட்டது.

இதனைத் தொடர்ந்து போலீஸ் விசாரணைக்கு ஒத்துழைப்பு வழங்காமல் தலைமறைவாக உள்ள வீரராஜ் மீது துறை ரீதியான நடவடிக்கை எடுக்க வேண்டும் என திருநெல்வேலி மாநகர காவல் துறை சார்பில் தீயணைப்பு துறை உயரதிகாரிகளுக்கு பரிந்துரை கடிதம் அனுப்பப்பட்டுள்ளது.

இத்தகவலை இவ்வழக்கை விசாரிக்கும் துணை கமிஷனர் வினோத் சாந்தாராம் தெரிவித்தார்.