மன் கிபாத் நிகழ்ச்சியில், 2025ம் ஆண்டில் பெருமைமிகு தருணங்களை பட்டியலிட்டு பிரதமர் மோடி பேசியதாவது: அறிவியல், விண்வெளித் துறையில் இந்தியா மாபெரும் முன்னேற்றத்தை அடைந்துள்ளது; சுபான்ஷு சுக்லா சர்வதேச விண்வெளி நிலையத்தில் நுழைந்த முதல் இந்தியர் என்ற வரலாற்றை படைத்தார். 2025ம் ஆண்டில் கிரிக்கெட் வெற்றி, அறிவியல் கண்டுபிடிப்பு, ஆபரேஷன் சிந்துார் என இந்தியா பல சாதனைகளை நிகழ்த்தி உள்ளது. பாரதத்தின் மகள்கள் பார்வையற்றோருக்கான டி-20 உலகக் கோப்பையை வென்று வரலாறு படைத்தனர்.

சமரசம் செய்யாது

உலக சாம்பியன்ஷிப் போட்டிகளில் பல பதக்கங்களை வென்றதன் மூலம், பாரா தடகள வீரர்கள் எந்த தடையும் உறுதியைத் தடுக்க முடியாது என நிரூபித்துள்ளனர். ஆப்பரேஷன் சிந்தூர் ராணுவ நடவடிக்கை நாட்டின் பாதுகாப்பிற்கான உறுதிப்பாட்டை நிரூபிக்க உதவியது. இந்தியா பாதுகாப்பில் சமரசம் செய்யாது என்ற செய்தியை உலகுக்கு அனுப்பியது.

எனது தொகுதியான வாரணாசியில் காசி தமிழ்சங்கமம் நிகழ்ச்சி நடத்தப்பட்டது. தமிழ் கற்கலாம் என்ற கருத்தின் அடிப்படையில் நடந்த இந்த நிகழ்வு தமிழ், ஹிந்தி பேசுவோரை இணைத்தது. இதில் ஹிந்தி பேசுவோரும் தமிழ் பேச கற்று கொண்டனர். அவர்கள் பேசியதை கண்டு நான் வியந்தேன்.

வியப்பில்...!

தமிழ் பெரும் கலாசாரமான மொழி ஆகும். நம்பிக்கை, கலாசாரம் மற்றும் பாரதத்தின் தனித்துவமான பாரம்பரியம் அனைத்தும் 2025ல் ஒன்றாக காணப்பட்டன. ஆண்டின் தொடக்கத்தில் பிரயாக்ராஜ் மஹா கும்பமேளா ஏற்பாடு செய்யப்பட்டது. இது உலகம் முழுவதையும் வியப்பில் ஆழ்த்தியது. ஆண்டின் இறுதியில் அயோத்தியில் உள்ள ராமர் கோவிலில் கொடியேற்ற விழா ஒவ்வொரு இந்தியரையும் பெருமைப்படுத்தியது.

இந்தியாவின் ஒற்றுமை

தமிழ் உலகின் பழமையான மொழி. தமிழ் இலக்கியமும் மிகவும் வளமானது. 'மன் கி பாத்' நிகழ்ச்சியில் 'காசி தமிழ் சங்கமம்' நிகழ்ச்சியில் பங்கேற்குமாறு நான் உங்களிடம் கேட்டுக் கொண்டேன். இன்று, நாட்டின் பிற பகுதிகளில், குழந்தைகள் மற்றும் இளைஞர்களிடையே தமிழ் மொழியில் மிகுந்த ஆர்வம் ஏற்பட்டுள்ளது என்பதில் நான் மகிழ்ச்சியடைகிறேன் - இதுதான் மொழியின் சக்தி; இதுதான் இந்தியாவின் ஒற்றுமை.

சுதேசி மீது ஆர்வம் அதிகரிப்பு

சுதேசி பொருட்கள் மீதான உற்சாகம் அனைவரிடமும் தெளிவாகத் தெரிந்தது. இந்தியரின் வியர்வையையும், இந்திய மண்ணின் மணத்தையும் தாங்கிய பொருட்களை மட்டுமே மக்கள் விரும்பி வாங்குகின்றனர்.இன்று, 2025 இந்தியாவுக்கு இன்னும் அதிக நம்பிக்கையை அளித்துள்ளது என்று பெருமையுடன் சொல்லலாம். இந்த ஆண்டு நாம் பல இடங்களில் இயற்கை பேரழிவுகளை எதிர்கொள்ள வேண்டியிருந்தது என்பதும் உண்மைதான். இப்போது, ​​2026ம் ஆண்டில் புதிய நம்பிக்கைகள் மற்றும் புதிய தீர்மானங்களுடன் நாடு முன்னேறத் தயாராக உள்ளது.

தமிழகம் முதலிடம்

'மன் கி பாத்' நிகழ்ச்சியில் நமது இளைஞர்களின் பங்களிப்பு அதிகரித்து வருவதைக் கண்டு நான் மகிழ்ச்சியடைகிறேன். சில நாட்களுக்கு முன், இது தொடர்பான வினாடி வினா போட்டி நடந்தது. 50 லட்சத்திற்கும் மேற்பட்ட இளைஞர்கள் பங்கேற்றனர். பல்வேறு தலைப்புகளில் மாணவர்கள் தங்கள் கருத்துக்களை வெளிப்படுத்தும் கட்டுரைப் போட்டியும் நடத்தப்பட்டது. இந்தப் போட்டியில் தமிழகம் முதலிடத்தை பெற்றது. உத்தரப் பிரதேச மாநிலம் இரண்டாவது இடத்தையும் பிடித்தது.

தமிழ் கற்கும் பிஜி மாணவர்கள்

இந்தியாவிலிருந்து ஆயிரக்கணக்கான கிலோமீட்டர் தொலைவில் உள்ள ஒரு முயற்சியைப் பற்றி இப்போது உங்களுடன் பகிர்ந்து கொள்ள விரும்புகிறேன். இது மனதைத் தொடுகிறது. பிஜியில், இந்திய மொழியையும் கலாசாரத்தையும் பரப்புவதற்கு ஒரு பாராட்டத்தக்க முயற்சி மேற்கொள்ளப்பட்டு வருகிறது. அங்குள்ள புதிய தலைமுறையினரை தமிழ் மொழியுடன் இணைக்க பல மட்டங்களில் தொடர்ச்சியான முயற்சிகள் மேற்கொள்ளப்பட்டு வருகின்றன. கடந்த மாதம், பிஜியின் ராக்கி-ராகியில் உள்ள ஒரு பள்ளியில் முதல் முறையாக தமிழ் தினம் கொண்டாடப்பட்டது. அன்று, குழந்தைகள் தங்கள் மொழியில் பெருமையை வெளிப்படையாக வெளிப்படுத்தும் ஒரு தளத்தைக் கண்டுபிடித்தனர். குழந்தைகள் தமிழில் கவிதைகளை வாசித்தனர். உரையாற்றினர். மேடையில் தங்கள் கலாசாரத்தை நம்பிக்கையுடன் வெளிப்படுத்தியது மிகவும் மகிழ்ச்சியாக இருந்தது.இவ்வாறு பிரதமர் மோடி பேசினார்.