ஜனாதிபதி முர்முவின் ஆவணப் படத்தை தயாரிக்கிறார் அமீர்கான்

பாலிவுட் நடிகர் அமீர்கானின், அமீர்கான் புரொடக்ஷன்ஸ் நிறுவனம் இந்திய குடியரசுத் தலைவர் திரவுபதி முர்முவின் வாழ்க்கை பற்றிய ஒரு ஆவணப்படத்தை தயாரிக்கிறது. இதற்கான ஸ்கிரிப்டுடன் ஜனாதிபதி முர்முவை சந்தித்து பேசினார் அமீர்கான். படத்திற்கு அவர் சம்மதம் தெரிவித்துள்ளார்.

இதனை தற்போது அமீர்கான நிறுவனம் அதிகாரபூர்வமாக அறிவித்துள்ளது. இதுகுறித்து வெளியிப்பட்டுள்ள செய்தி குறிப்பில் “ஜனாதிபதியின் வரலாற்று ஆவணப் படத்தை திரைப்பட இயக்குநரும் எழுத்தாளருமான ஸ்வாதி சக்ரவர்த்தி பட்கல் இயக்கவுள்ளார். இந்த ஆவணப்படம் ஒடிசாவின் ஒரு சிறிய கிராமத்திலிருந்து இந்தியாவின் முதல் பழங்குடியின குடியரசுத் தலைவராகவும், நாட்டின் மிக உயர்ந்த அரசியலமைப்பு பதவியை வகிக்கும் இரண்டாவது பெண்ணாகவும் உயர்ந்த ஜனாதிபதி முர்முவின் அசாதாரணமான பயணத்தைக் காட்சிப்படுத்தவுள்ளது.

இப்படம் முர்முவின் வாழ்க்கையின் முக்கிய அத்தியாயங்களை விவரிக்கும். அவர் பொது வாழ்க்கையில் நுழைவதற்கு முன்பும், இறுதியில் குடியரசுத் தலைவர் பதவியைப் பெறுவதற்கு முன்பும் எதிர்கொண்ட தனிப்பட்ட சோதனைகள், சோகங்கள், சவால்கள் மற்றும் பின்னடைவுகளைக் கடந்து வந்ததை இது பதிவு செய்யும். மேலும், அவரது பொதுச் சேவை ஆண்டுகளை ஆராய்ந்து, அவரது தலைமையை வடிவமைத்த பின்னடைவுத் திறன் மற்றும் உறுதியை மிக நெருக்கமாகக் காட்டும். என்று குறிப்பிடப்பட்டுள்ளது.