சிவகார்த்திகேயன் படங்களால் 120 கோடி நஷ்டம் : தயாரிப்பாளர் பகிர்ந்த தகவல்

சிவகார்த்திகேயன் நடித்த 'ஹீரோ', 'டாக்டர்', 'அயலான்' உள்ளிட்ட படங்களைத் தயாரித்தவர் கோட்டப்பாடி ஜே. ராஜேஷ்.. சமீபத்திய நேர்காணல் ஒன்றில் இவர் கூறும்போது, சிவகார்த்திகேயன் படங்களைத் தயாரித்த வகையில் கிட்டத்தட்ட 120 கோடி ரூபாய் நஷ்டம் ஏற்பட்டதாக ஒரு அதிர்ச்சித் தகவலைக் கூறியுள்ளார். இதில் 'டாக்டர்' படம் முழுக்க முழுக்க இவர் தயாரித்தது. 'ஹீரோ' மற்றும் 'அயலான்' ஆகிய படங்கள் தயாரிப்பில் இருக்கும்போது நெருக்கடியைச் சந்தித்ததால், அந்த தயாரிப்புப் பொறுப்பை ஏற்றுக்கொண்டு அந்தப் படங்களைத் தயாரித்து வெளியிட்டார்.

அந்த வகையில் கிட்டத்தட்ட தனக்கு 120 கோடி நஷ்டம் ஏற்பட்டது என்றும், சிவகார்த்திகேயனுக்கும் இதில் 55 கோடி நஷ்டம் ஏற்பட்டது என்றும் கூடுதல் விவரங்களையும் அவர் கூறியுள்ளார். 'ஹீரோ' திரைப்படம் எதிர்பார்த்த வெற்றியைப் பெறத் தவறியதும்; 'டாக்டர்', 'அயலான்' போன்ற படங்கள் தயாரிப்பில் இருந்த காலகட்டத்தில் கொரோனா தாக்கம் காரணமாக கிட்டத்தட்ட மூன்று வருடங்கள் தயாரிப்புப் பணிகள் நிறுத்தப்பட்டிருந்ததால், அது முதலீடு செய்திருந்த பணத்திற்கான வட்டித் தொகையில் மிகப்பெரிய அளவில் பாதிப்பை ஏற்படுத்தியது என்றும் கூறியுள்ளார் கோட்டப்பாடி ஜே. ராஜேஷ்.