இதேபோல முன்னாள் அமெரிக்க அதிபர் பராக் ஒபாமா அவரது ஆட்சி காலத்தில் உலகின் நவீன ஹியூமனாய்டு ரோபோவாகத் திகழ்ந்த ஜப்பானின் அசிமோ ரோபோவுடன் கால்பந்து விளையாடினார். உலகின் பல நாட்டுத் தலைவர்கள், வெளியுறவுச் செயலாளர்கள் பலர் இதுபோல ரோபோக்களுடன் கலந்துரையாடுவது கடந்த ஐந்து தசாப்தங்களில் ரோபோ தொழில்நுட்பத்தின் அபரிமித வளர்ச்சியை எடுத்துரைக்கிறது.

ரோபோக்கள் எதிர்காலத்தில் நாட்டின் தலைவர்கள், மாநில முதல்வர்களின் நம்பிக்கைக்குரிய பணியாளாக அரசியலில் பங்காற்றும் என விஞ்ஞானிகள் கருதுகின்றனர். செயற்கை நுண்ணறிவு ரோபோக்களின் கணிதத் திறமை, சாதுர்யம், ஆற்றல், உழைப்பு உள்ளிட்டவற்றால் கவரப்படும் வளர்ந்த நாடுகளின் தலைவர்கள் பலர் ஹியூமனாய்டு ரோபோ ஆய்வுக்கு அதிக நிதி ஒதுக்குகின்றனர்.