பொதுத் துறையைச் சேர்ந்த இந்தியன் ஆயில், பாரத், ஹிந்துஸ்தான் பெட்ரோலியம் ஆகிய எண்ணெய் நிறுவனங்கள், வீடுகளுக்கு, 14.20 கிலோ எடையிலும்; வணிக பயன்பாட்டிற்கு, 19 கிலோ எடையிலும், சமையல் காஸ் சிலிண்டர்களை வினியோகம் செய்கின்றன.

சர்வதேச சந்தையில் நிலவும் கச்சா எண்ணெய் விலைக்கு ஏற்ப, மாதம்தோறும் உள்நாட்டில் சமையல் காஸ் சிலிண்டர் விலையில் மாற்றம் செய்யப்படுகின்றன.

தமிழகத்தில் கடந்த அக்டோபரில் வீட்டு சிலிண்டர், 818.50 ரூபாய்க்கு விற்பனையானது. இம்மாதம் மாற்றம் செய்யப்படாமல், அதே விலை நிர்ணயம் செய்யப்பட்டுள்ளது.

அக்டோபரில், வணிக சிலிண்டர் விலை, 1,903 ரூபாய்க்கு விற்கப்பட்டது. இம்மாதம் அதன் விலை, 61.50 ரூபாய் உயர்ந்து, 1,964.50 ரூபாயாக அதிகரித்துள்ளது.

கடந்த மார்ச் 1ல் வீட்டு சிலிண்டர், 918.50 ரூபாய்க்கு விற்கப்பட்டது.

பின், மகளிர் தினத்தை முன்னிட்டு, மார்ச் 9ம் தேதி அந்த சிலிண்டர் விலை, 100 ரூபாய் குறைக்கப்பட்டு, 818.50 ரூபாய்க்கு விற்கப்பட்டது. அன்று முதல் இம்மாதம் வரை ஏழு மாதங்களாக, வீட்டு சிலிண்டர் விலை மாற்றப்படாமல் உள்ளது.