சேலம் மாவட்டம் மேச்சேரியில் விவசாய சங்கத்தினர் ஏற்பாடு செய்திருந்த கூட்டத்தில் அ.தி.மு.க., பொதுச் செயலாளர் இ.பி.எஸ்., கலந்து கொண்டார். அப்போது அவர் பேசியதாவது;

தமிழகத்தில் இன்று ஊழல் நடக்காத துறையே இல்லை. ஊழல் மலிந்த அரசாங்கமாக இன்றைக்கு தி.மு.க., அரசாங்கம் திகழ்ந்து கொண்டு இருக்கிறது. அ.தி.மு.க., ஆட்சி வரும்போது ஸ்டாலின் இதற்கு பதில் சொல்லியே ஆகவேண்டும்.

பா.ஜ.,வுடன் அ.தி.மு.க., கூட்டணி வைப்பதாக உதயநிதி கூறி வருகிறார். நாங்கள் கூட்டணி வைக்கவில்லை, நீங்கள் தான் கூட்டணி வைக்க முயற்சித்து வருகிறீர்கள். எதிர்க்கட்சி தலைவராக ஸ்டாலின் இருந்த போது பிரதமர் மோடியின் தமிழக பயணத்தின் போது கருப்பு பலூன்களை பறக்கவிட்டார்.

பிரதமராக மோடி வந்தபின்னர், ஸ்டாலின் முதல்வரான போது வெள்ளைக் கொடி பிடித்து, வெல்கம் மோடி என்றவர் இதே ஸ்டாலின் தான். இரட்டை வேடம் புரிகிறவர் ஸ்டாலின். ஒரு பக்கம் கூட்டணி வைத்துக் கொண்டு மறுபுறம் பேசுபவர்கள் அ.தி.மு.க., அல்ல.

பா.ஜ., அரசுடன் ஒத்து போகவில்லை என்றால் இவர்கள் கொள்ளை அடித்த பணத்துக்கு வழக்கு போட்டுவிடுவார்கள். ரெய்டு எங்களுக்கு வராது, உங்களுக்கு தான் வரும். 2011ம் ஆண்டில் ஒரு பக்கம் ரெய்டு, மறுபக்கம் காங்கிரசுக்கு 63 சீட்டுகள் கொடுத்தவர் ஸ்டாலின். அ.தி.மு.க., வரலாறு அப்படி அல்ல. நாட்டு மக்களுக்கு எது தேவையோ என்பதை அறிந்து, அதற்காக பாடுபடும் கட்சி அ.தி.மு.க.

ஆட்சிக்கு வந்தவுடன் நீட் தேர்வு ரத்து தான் முதல் கையெழுத்து என்று சொன்னீர்கள்? ஆனால் 42 மாதங்கள் கடந்துவிட்டது. நீட் தேர்வு ரத்து செய்யும் ரகசியம் எங்களிடம் உள்ளது என்று உதயநிதி தொடர்ந்து கூறி வருகிறார். சீக்கிரம் அந்த ரகசியத்தை சொல்லி விடுங்கள். மக்களிடம் பொய் பேசி ஆட்சிக்கு வந்துள்ளீர்கள். நீங்கள் தான் பொய்யர், நாங்கள் அல்ல.

நேற்று பெய்த மழையில் இன்று முளைத்த விஷக்காளான் உதயநிதி. அப்பா, மகன் இருவரும் ஒருவரை ஒருவர் மாறி, மாறி புகழ்ந்து பேசுகின்றனர்.

இவ்வாறு இ.பி.எஸ்., பேசினார்.