என்.ஐ.ஏ., விசாரிக்க கோரிக்கை

மதுரை கலெக்டர் சங்கீதாவிடம் பா.ஜ., வழக்கறிஞர் முத்துக்குமார் அளித்த மனு: தமிழகத்தில் தீவிரவாதம் தலைதுாக்கி உள்ளது. என்.ஐ.ஏ., சோதனை, வழக்குகள் பதிவு மூலம் தெரிகிறது. திருப்பரங்குன்றம் மலைமீது 2012ல் வெடிகுண்டு, பேட்டரிகள், மூலப்பொருட்கள் கண்டுபிடிக்கப்பட்ட வழக்கு நிலுவையில் உள்ளது. இந்த மலையின் ஒரு பகுதி தொல்லியல் துறை, மற்றொரு பகுதி ஹிந்து அறநிலையத் துறையால் கண்காணிக்கப்படுகிறது. போலீசாரும் பாதுகாப்பில் உள்ளனர்.இவற்றையும் மீறி சிலர் மலையில் திட்டமிட்டு பச்சை வண்ணத்தை வரைந்துள்ளனர். ஹிந்துக்கள் உணர்வை புண்படுத்துவதாக படிக்கட்டுகளில் அமர்ந்து அசைவ உணவை உண்டனர். காசி விஸ்வநாதர் கோயிலின் புனிதத்தை கெடுக்கும் வகையில் ஆடு, கோழிகளை பலியிடப் போவதாகவும், மலையை சிக்கந்தர் மலை என்றும் குறிப்பிட்டு, வேண்டுமென்றே கலவரத்தை துாண்டும் நோக்கத்துடன் செயல்படுகின்றனர்.இவ்வாறு செயல்படுவோரை கண்டறியவும், இதற்கு மூளையாக செயல்படும் தேச விரோத சக்திகளை சுதந்திரமாக விசாரிக்கவும் திருப்பரங்குன்றம் போலீசார் வழக்குப் பதிவு செய்த வழக்குகள் அனைத்தையும் என்.ஐ.ஏ., அமைப்புக்கு மாற்ற வேண்டும். தொடர்ந்து அசம்பாவிதம் நடப்பதை தடுக்க துணை ராணுவப் படையையும் நியமிப்பதுடன், மலைமேல் கண்காணிப்பு கேமராக்களை பொருத்தி பாதுகாக்க வேண்டும். இவ்வாறு தெரிவித்துள்ளார்.