உடுமலை, குடிமங்கலம், மடத்துக்குளம் வட்டாரங்களில், பிரதான சாகுபடியாக தென்னை உள்ளது. இதில், தேங்காய் உற்பத்திக்காக மட்டுமல்லாது, இளநீருக்கென பிரத்யேகமாக ஓட்டு ரக தென்னை மரங்களை, விவசாயிகள் பராமரிக்கின்றனர்.

கடந்த சில ஆண்டுகளாக, இவ்வகை ஒட்டுரக தென்னை மரங்கள், வெள்ளை ஈ தாக்குதலால் பாதிப்பது தொடர்கதையாக உள்ளது. மரங்கள் பச்சையம் இழந்து, கருப்பாக மாறி இளநீர் காய்கள் உற்பத்தி முற்றிலுமாக பாதித்தது.

பெரும்பாலான விவசாயிகள் வெள்ளை ஈ தாக்குதலை கட்டுப்படுத்த முடியாமல், இளநீர் உற்பத்திக்காக பராமரித்த தென்னை மரங்களை, வெட்டி அகற்றும் நிலைக்கு தள்ளப்பட்டனர். கடந்தாண்டு, உற்பத்தி சீரான நிலையில் மீண்டும் வெள்ளை ஈ தாக்குதல், தென்னை மரங்களை கடுமையாக பாதித்துள்ளது.

வழக்கமாக கோடை காலத்தில், தேங்காய் மற்றும் இளநீர் உற்பத்தி அதிகரிக்கும். இந்தாண்டு வழக்கத்துக்கு மாறாக உற்பத்தி முற்றிலுமாக குறைந்து விட்டது.

தற்போது நேரடியாக தென்னந்தோப்புகளுக்கு சென்று, இளநீர் ஒன்று, 40 - 50 ரூபாய் வரை கொள்முதல் செய்கின்றனர். ஆரஞ்ச் மற்றும் பச்சை என இரு வகை இளநீர் காய்களுக்கும், தேவை அதிகரித்துள்ளது.

விவசாயிகள் கூறியதாவது: இளநீர் உற்பத்திக்கான மரங்களை பராமரிப்பது மிக கடினமானதாக மாறியுள்ளது. வெள்ளை ஈ தாக்குதல் மட்டுமல்லாது, உரம் உட்பட பிற இடுபொருட்கள் செலவும் பல மடங்கு அதிகரித்துள்ளது.

நோய்த்தாக்குதல்களை கட்டுப்படுத்தினால் மட்டுமே, இவ்வகை தென்னை மரங்களை தொடர்ந்து பராமரிக்க முடியும்.

இவ்வாறு, தெரிவித்தனர்.