துல்லிய கணக்கெடுப்பு அவசியம் அத்திக்கடவு திட்டத்தில் இந்தாண்டுக்குரிய, 1.5 டி.எம்.சி., நீர், நீர்வளத்துறையினரால் எடுக்கப்பட்டு விட்டது. இருப்பினும், பல இடங்களில் சிறிய குளம், குட்டைகளுக்கு நீர் சரிவர வந்து சேரவில்லை. அதேநேரம், பெரிய குளம், குட்டைகளில் அத்திக்கடவு நீர் நிரம்பி ததும்புகிறது; இதனால், நிலத்தடி நீர்மட்டம் வெகுவாக உயர்ந்திருக்கிறது. திட்டம் வருவதற்கு முன் கிணற்று நீர், 'போர்வெல்' பாசனம் வாயிலாக, விவசாயிகள் நீர்பாய்ச்சி வந்தனர். தற்போது, 'போர்வெல்' பயன்பாடு வெகுவாக குறைந்திருக்கிறது. அத்திக்கடவு திட்டம் சார்ந்து பயன் பெறும் பகுதிகளில், உள்ள விவசாய நிலங்களில் 'போர்வெல்' பயன்பாடு குறைந்ததால், எந்தளவு மின் சிக்கனம் ஏற்பட்டிருக்கிறது என்ற கணக்கெடுப்பு நடத்தப்பட வேண்டும்; அப்போது தான், அரசுக்கு எந்தளவு மின் கட்டணம் சேமிக்கப்பட்டிருக்கிறது என்பதை அறிந்துகொள்ள முடியும்; திட்டத்தின் பயனும் தெரியவரும். அதேநேரம், இத்திட்டத்தில், மின்சார உதவியுடன் தான் நீரேற்றப்பணிகள் நடக்கின்றன; கோடிக்கணக்கான ரூபாய் மின்கட்டணமாக செலவிடப்படுகிறது. எனவே, சோலார் மின் கட்டமைப்பின் வாயிலாக மின் தேவையை பூர்த்தி செய்தால், மின் கட்டணமாக செலவிடப்படும் பெரும் தொகை, அரசுக்கு சேமிப்பாக அமையும். - பெரியசாமி, செயலாளர் குளம், குட்டைகளுக்கு நீர் நிரப்புவோர் இயக்கம்---