தமிழக, கேரளாவை இணைக்கும் வகையில் தேவாரம் சாக்கலூத்துமெட்டு ரோடு திட்டம் உள்ளது. கேரளா நெடுங்கண்டத்திற்கு தேவாரத்தில் இருந்து 50 கி.மீ., சுற்றிச் செல்ல வேண்டும். உடும்பசோலை செல்வதற்கு 60 கி.மீ., செல்ல வேண்டும். குறைந்தது 2 மணி நேரம் ஆகும்.

ஆனால் தேவாரம் டி.மேட்டுப்பட்டியில் இருந்து சாக்கலூத்துமெட்டு வழியாக 22 கி.மீ., தூரம் உள்ள நெடுங்கண்டத்திற்கு அரை மணி நேரத்திலும், உடும்பஞ்சோலைக்கு ஒரு மணி நேரத்தில் சென்று விடலாம். இதன் மூலம் நேரமும், துாரமும் குறையும். கேரளா நெடுங்கண்டத்தில் இருந்து சாக்கலூத்துமெட்டு வரை ரோடு வசதி உள்ளது. தமிழக பகுதியான டி.மேட்டுப்பட்டி மலை அடிவாரத்தில் இருந்து 4 கி.மீ., தூரம் உள்ள சாக்கலுாத்துமெட்டு செல்ல பாதை வசதி இருந்தும், ரோடு வசதி இல்லை. 43 ஆண்டுகளாக சாக்கலூத்துமெட்டு ரோடு திட்டம் வனத்துறையின் முட்டுக்கட்டையால் கிடப்பில் உள்ளன.

திட்டம் குறித்து தமிழக, கேரள உள்ளாட்சி பிரதிநிதிகள், வர்த்தகர்கள், அரசியல் கட்சியினர் ஆலோசனைக் கூட்டம் நடந்தது. இந்நிலையில் நேற்று எம்.பி.,தங்கத் தமிழ்ச் செல்வன் தலைமையில் 25 கிராம கூட்டுக்குழுவினர், அரசியல் கட்சியினர் தேவாரம் டி.மேட்டுப்பட்டி மலை அடிவாரத்தில் இருந்து மலைப் பாதையில் சாக்கலூத்துமெட்டு வரை நடை பயணம் மேற்கொண்டார். இவர்களை இடுக்கி எம்.பி., டீன் குரியகோஸ், உடும்பஞ்சோலை எம்.எல்.ஏ., மணி முன்னிலையில் கேரள ஒருங்கிணைப்பு குழுவினர், அரசியல் கட்சியினர், விவசாயிகள் வரவேற்றனர்.

இரு மாநில வர்த்தகம் மேம்படும்

தங்க தமிழ்ச்செல்வன் கூறுகையில்: சாக்கலூத்துமெட்டு ரோடு திட்டம் வனத்துறையால் நிறுத்தி வைக்ப்பட்டுள்ளது. இத்திட்டம் நிறைவேற்றுவதன் மூலம் கேரள மக்கள் சிகிச்சை பெற தேனி அரசு மருத்துவக் கல்லூரிக்கு ஒரு மணி நேரத்தில் வரலாம். இரு மாநில விவசாயம், வர்த்தகம் மேம்படும். கேரள எம்.பி., டீன் குரியகோஸ் உடன் இணைந்து சாக்கலூத்துமெட்டு ரோடு அமைக்க மத்திய, மாநில அமைச்சர்கள், அதிகாரிகளை சந்தித்து திட்டம் நிறைவேற்ற நடவடிக்கை எடுக்கப்படும் என்றார்.