நீலகிரி மாவட்டத்தில், ஊட்டி, குன்னுார், கோத்தகிரி, குந்தா, பந்தலுார், கூடலுார் பகுதிகளில், 280 பேரிடர் பகுதிகள் கண்டறியப்பட்டுள்ளன. பருவ மழை காலங்களில், மண் சரிவு, நிலச்சரிவால் பேரிடர் பாதிப்புகள் அதிகரிக்கிறது.

இதனை தடுக்கும் வகையில், மழை காலங்களில் தண்ணீர் தடையின்றி வெளியேற நெடுஞ்சாலைத்துறை சார்பில் மாவட்டத்தில் தேவைப்படும் இடங்களில் சிறு பாலங்கள் அமைக்கப்பட்டுள்ளது. பராமரிப்பின்றி காணப்பட்ட சிறு பாலங்கள் சீரமைக்கப்பட்டு வருகிறது.

'ைஹட்ரோ சீடிங்' முறை

இதை தவிர, மாவட்டத்தில் நிலச்சரிவை தடுக்க நெடுஞ்சாலைத்துறை கட்டுப்பாட்டில் உள்ள சாலையோரம், 'சாயில் நெய்லி' பொருத்தி, 'ைஹட்ரோ சீடிங்' முறையில் பசுமையை பேணி பாதுகாக்கும் தொழில் நுட்பம் தீவிரமாக செயல்படுத்தப்பட்டு வருகிறது.

கடந்தாண்டு பரிசோதனை முயற்சியாக, ஊட்டி - கோத்தகிரி சாலையில் கோடப்பமந்து மற்றும் பாக்கியநகர் ஆகிய இரு இடங்களில் இப்பணியானது செயல்படுத்தப்பட்டது.

அதில், மண்ணரிப்பை தடுக்கும் விதமாக புற்கள் வளர்ந்துள்ளன. இந்த தொழில் நுட்பம் திருப்திகரமாக இருந்ததால், மாவட்டத்தில் நிலச்சரிவு உள்ள பகுதிகளில் செயல்படுத்த நெடுஞ்சாலைத்துறையினர் பரிந்துரைத்துள்ளனர்.

ஐந்து இடங்களில் பணி

அதன்படி, மாநில நெடுஞ்சாலைத்துறை திட்ட அறிக்கை தயாரித்தது. முதற்கட்டமாக, 'கோத்தகிரி - குன்னுார் சாலை கட்டபெட்டு நடுஹட்டி பவர்ஹவுஸ் பகுதி; குன்னுார் - கேத்தி பாலாடா, சேலாஸ் சாலையில் உல்லாடா பகுதி; ஊட்டி - கோத்தகிரி மற்றும் மேட்டுப்பாளையம் சாலையில் கோடப்பமந்து மற்றும் மடித்தொரை; ஊட்டி - அவலாஞ்சி சாலையில் இத்தலார்,' என, 5 இடங்களில் ,'ைஹட்ரோ சீடிங்' பசுமை பணியானது நடந்து வருகிறது.

இந்நிலையில், ஊட்டி - கோத்தகிரி சாலையில் மடித்தொரையில் நடந்து வரும் பணிகளை மாநில நெடுஞ்சாலைத்துறை தலைமை பொறியாளர் சந்திரசேகர் ஆய்வு செய்தார். கோவை நெடுஞ்சாலைத்துறை வட்ட கண்காணிப்பு பொறியாளர் ரமேஷ், ஊட்டி நெடுஞ்சாலைத்துறை கோட்ட பொறியாளர் குழந்தைராஜ் உட்பட பலர் உடனிருந்தனர்.