கச்சேரிகளை ரசிக்க 'ஒரு நாள் போதுமா' அ காடமியின் மார்கழி விழா துவக்க நாள் இரவு , வித்தியாசமான நிகழ்ச்சி ஒன்றை மிருதங்க வித்வான் அருண் பிரகாஷ் வழங்கினார். மேடையி ல் இரட்டைத் தம்பூராக்களோடு அரைவட்டமாகப் பலவர்ணப் பட்டாடைகளில் பதினாறு இளைய தலைமுறைக் கலைஞர்கள் அமர்ந்திருந்தனர். வயலின், குழல், நாதஸ்வரம், வீணை, சித்ரவீணை, முகர்சிங், மிருதங்கம், கடம் என - தவில் காணோமே? - ஆண், பெண் பாடகர்களோடு இணைத்து பாட்டிசைத்தார். அதேபோல் இடையிசையும் தனித்தனியே அமைத்துப் அபங், பல்லவி, தில்லானா போன்ற பலவித இசை வடிவங்களை தனி ஆவர்த்தனங்களோடு வழங்கினர். திருவிளையாடல் திரைப்படத்தின் 'ஒரு நாள் போதுமா' பாடல் காட்சி, சட்டென நினைவூட்டியது. கேட்டு ரசிக்க ஓர் இரவு போதாது. 'பின்னொரு இரவினிலே' என, துவங்கிய பாரதியார் பாட்டும் 'வாழ்வினில் அனைவருக்கும் பிரதானமானது மனிதநேயம்' என்ற கண்டஜாதி திரிபுடைத் தாளப் பல்லவியும், இந்நிகழ்ச்சியின் உயரொளி. பல்லவியில் 'பிரதானமான' என்பதற்குத் தமிழ்ச்சொல் ஏதாவது பொருத்தியிருக்கலாம். பாடகர் 'அனிவருக்கும்' என்ற உச்சரிப்பையும் தவிர்த்திருக்கலாம். சே ர்த்தலை முனைவர் ரங்கநாத சர்மா, பார்த்தசாரதி சுவாமி சபாவில் மாலைக் கச்சேரியில் அரிய எழுபத்தியொன்றாவது மேளகர்த்தா கோசலம் ராகத்தில், கோடீஸ்வரின் கிருதி காகுகா வழங்கிய ஆலாபனை, நல்ல முயற்சி. இந்தச் சம்பூர்ண ராகத்தினுடைய ஸ்வரங்களை 'ரிமதநி, பதபகஸ' என்று பிரித்து விரிக்கையில், வேறு ஜன்ய ராகங்கள் ஒலிப்பது பரவாயில்லை; ஆனால் கோசலத்தின் உருவம் என்னவென்றே புரியாமல் போவது தோல்வி. இம்முயற்சியுடன் ஒப்பிட்டால் இதே சபாவில் மறுநாள் மாலைக் கச்சேரியில் முனைவர் பந்துல ரமாவின் அரிய 'சௌவீரம்' ராகம், இதை சுவர்நாங்கி என்றும் சொல்வர், ஆலாபனை நேர்த்தியா னது.

இரட்டை வீணையின் வசீகரம் வி.வி.எஸ்., பவுண்டேஷன், சாமா ஆர்ட்ஸ் இணைந்து வழங்கும் ஒன்றரை மணி நேர 'ஏகாந்த வரிசை' கச்சேரிகள், காலை 6:00 மணிக்கு மயிலாப்பூர் சுந்தரேசன் தெருவில் நடந்து வருகின்றன. ஆட்டோவில் பயணிக்கையில், சென்னைச் சாலைகள் இவ்வளவு அகலமானவையா என வியந்தவாறு ஆஞ்சநேயர் - ராகவேந்திரர் கோவிலை அ டைந்தேன். உள்ளே, அம்புக்குறியிடப்பட்ட தரையில் வலமாக நடந்து சுவர் ஓரம் அமர்ந்தேன். அகல் விளக்குகளின் வெளிச்சத்தில் மைக் ஸ்பீக்கர் மேடைகள் இன்றி, மிருதங்கம், முகர்சிங் பக்கவாத்தியங்களுடன், இரட்டை வீணைக் கச்சேரி, குறித்த நேரத்திற்குத் துவங்கிவிட்டது. நாட்டை ராக 'மஹாகணபதிம்' கிருதிக்கு அடுத்து, ஆபோகி ராகத்தில் ஆலாபனை. தும்மல், இருமல்கள் கார்வைகளை அமிழ்த்திவிடும் அபாய அமைதியினுாடே இரண்டு வீணைகளிலும் ராகம் நன்றாகவே வடிவமைந்து ஒலித்தது. ராம்நாத் - கோபிநாதர் என பெயருடைய அய்யர் சகோதரர்கள், ஆஸ்திரேலிய மெல்போர்ன் வாசிகள். சீசனுக்குத் தவறாமல், சென்னை வந்து வாசித்துச் செல்கின்றனர். அந்த வகையில், மெயின் உருப்படி கல்யாணி ராகத்தில். முகர்சிங்கும் வீணையும் இரட்டைத் தந்தி வாத்தியங்கள் போல ஸ்ருதியும் , லயமும் இணைந்து வழங்கிய கிருதி வடிவம். இவ்வகை 'சேம்பர்' இசை அரங்கி லேயே கேட்கச் சாத்தியம். சுற்றம், அதிகாலை அரையிருட்டில் இருக்கையில் மனத்தினுள் கலைத்தெய்வம் மட்டும் பிரகாசமாய் வியாபிக்க வாய்ப்பு அதிகம். வெளிச்சம் ஏறியதும் அறையின் குறுக்காய் தரையில் பாயும் மின்சார ஒயரும் ராகவேந்திரர் படத்தின் கோணலும் மனத்தின் லவுகீக விமர்சனப்புலத்தை வியாபிக்கத் துவங்க விடைபெற்றேன்.

நாகஸ்வரத்தில் கானம் மயிலாப்பூர் ஆஞ்சநேயர் கோவிலில் காலணி அகற்றி, கால்கள் கழுவி, கால்சிராய் ஈரம் கலையாமல் ஜமுக்காளத்தில் சம்மண மிடுகையில், மாம்பலம் துரையும், சைதை வெங்கடேசனும் நாகஸ்வரத்தில் வர்ணம் முடிந்து, 'துடுக்குகல' என்ற தியாகராஜரின் பஞ்ச ரத்ன கௌளை ராகக் கிருதியைத் துவங்கிவிட்டிருந்தனர். இயல்பில் ஓங்கி யொலிக்கும் நாகஸ்வர செட்டிற்குத் திறந்தவெளித் திடலே சரி. கோவில் வளாகம், வேண்டிய ஆன்மிகப் பி ன்புலத்தை அளிக்கிறது. என்னோடு ரசிப்பதற்கு முட்டி மடக்கிச் சம்மணமிட முடியாத நான்கைந்து வெள் ளைக்காரர்களும் இருந்தனர். நாகஸ்வரம் கண்கள் மூடி, கன்னம் புடைக்க, கானமூர்த்தி ஆலாபனையில் ஆழ்ந்திருந்தார். தொடர்ந்து கானமூர்த்தி என்று வேணுகான மூர்த்தியை விவரித்து, தியாகராஜரின் ஆதி தாளக் கிருதி வந்தது. அகாடமியில் ராமநாதன் - யுவராஜ் நாகஸ்வரத்தில் வழங்கிய ஜெயந்தசேனா நாட்டைகுறிஞ்சி, பல்லவிக்கு முன்னர் செய்த ராக ஆலாபனைகளும், இங்கு வழங்கப்பட்ட கானமூர்த்தி கௌரிமனோஹரி, மெயின் உருப்படியாக ராக ஆலாபனைகளும், சீசன் முழுதும் காத்திருந்தாலும் மீண்டும் அமையுமா என்பது சந்தேகமே! வடபழனி வடிவேலும் , வேதாரண்யம் ரமேஷும் செய்த இரட்டைத் தவில் தனி ஆவர்த்தனம், ரூபக தாளத்தில் அசத்தினர். பக்தர்களும் இன்றி கோவில் வளாகமே வெறிச்சோடியிருக்க, அந்தக்கால அரசனைப் போல அமர்ந்து ரசித்தேன்.