ரைசிங் ஸ்டார் கூடைப்பந்து கிளப் சார்பில், 18வது ஆண்டிற்கான மாநில அளவிலான கூடைப்பந்து போட்டி, சென்னையில் நேற்று துவங்கியது.

போட்டிகள், தி.நகர், வெங்கட்நாராயணா தெருவில் உள்ள சென்னை மாநகராட்சி மைதானத்திலும், பெரியமேடு நேரு விளையாட்டு மைதானத்திலும் நடக்கின்றன.

இதில், ஐ.சி.எப்., - எஸ்.ஆர்.எம்., பல்கலை, இந்தியன் வங்கி, சத்யபாமா, ரைசிங் ஸ்டார் உட்பட ஆண்களில், 75 அணிகளும், பெண்களில் 26 அணிகளும் பங்கேற்றுள்ளன.

போட்டிகள், அரையிறுதிக்கு முந்தைய சுற்று வரை, 'நாக் - அவுட்' முறையிலும், அரையிறுதியில் இருந்து, 'லீக்' முறையிலும் நடக்கின்றன.

நேற்று காலை, நேரு விளையாட்டு மைதானத்தில் நடந்த முதல் போட்டியில், இந்துஸ்தான் அகாடமி மற்றும் 6 அணிகள் மோதின. விறுவிறுப்பான போட்டியில் இந்துஸ்தான் அகாடமி, 60 -- 40 என்ற புள்ளிக் கணக்கில் வெற்றி பெற்றது.

மற்றொரு போட்டியில் நாகன் மெமோரியல் அணி 84- 64 என்ற கணக்கில் ஸ்ரீ ராகவேந்திரா கிளப் அணியை தோற்கடித்தது.

சக்ஸஸ் அணி, 47--30 என்ற கணக்கில் யூனிக்ஸ் அணியை வீழ்த்தியது. போட்டிகள் தொடர்ந்து, மே 1ம் தேதி வரை நடக்கின்றன.