சென்னை, வியாசர்பாடி 3வது பள்ள தெருவைச் சேர்ந்தவர் தாமோதரகண்ணன், 24; தனியார் நிறுவன ஊழியர். இவர் வியாசர்பாடி காவல் நிலையத்தில் அளித்த புகாரில் குறிப்பிடப்பட்டிருந்ததாவது:

நான், கடந்த ஜனவரி மாதம் 'சே ஹாய் ஸ்டோம்' என்ற ஆன்லைன் 'டேட்டிங் ஆப்'பை பயன்படுத்தினேன். அதில், அகிலா என்ற பெண் அறிமுகமானார். பின், ஆபாச அழைப்புக்கு அகிலா அழைப்பு விடுத்து பேசினார்; நாளடைவில் பணம் கேட்டு மிரட்டினார். பின், பயந்து போய் 500 ரூபாய் அனுப்பினேன்.

ஆனால், தொடர்ந்து பணம் கேட்டு குறுஞ்செய்தியும், போன்களும் வந்தபடி இருந்தன. எனவே, அந்த மொபைல் போன் ஆப்பை, மொபைல் போனில் இருந்து 'அன்இன்ஸ்டால்' அதாவது நீக்கி விட்டேன்.

பின், கடந்த பிப்., 2ம் தேதி, என் மொபைல் போன் எண்ணுக்கு போன் வந்தது. அதில், 'நான் சைபர் கிரைம் இன்ஸ்பெக்டர் பேசுகிறேன். நீங்கள் பணம் அனுப்பிய அகிலா என்ற பெண் தற்கொலை செய்து கொண்டார். அதற்கு நீங்கள் தான் காரணம். அதற்கு உங்கள் மேல் எப்.ஐ.ஆர்., பதிவு செய்யப்பட உள்ளது. போடக்கூடாது என்றால், அதற்காக 70,000 ரூபாய் தர வேண்டும்' என மிரட்டினார்.

நான் பயந்து போய், என் வங்கி கணக்கில் இருந்த 13,000 ரூபாயை அனுப்பினேன். பணத்தை பெற்ற நபர்கள் மீண்டும் பணம் கேட்டு, தொடர்ந்து மிரட்டி வருகின்றனர். எனவே, ஆபாச வீடியோ மற்றும் செக்ஸ் அழைப்புக்கு அழைத்து பணம் கேட்டு மிரட்டி வந்த நபர்கள் மீது, நடவடிக்கை எடுக்க வேண்டும்.

இவ்வாறு அதில் குறிப்பிடப்பட்டிருந்தது.

இது குறித்து, வியாசர்பாடி போலீசார் வழக்கு பதிந்து விசாரணை மேற்கொண்டனர். இதில், தாமோதரகண்ணனின் மொபைல் போனில் மிரட்டல் விடுத்த எண்கள் அனைத்தும், ஆவடி அடுத்த பட்டாபிராம் பகுதியில் இருப்பது தெரியவந்தது.

இதையடுத்து போலீசார், பட்டாபிராம், வேளாங்கண்ணி குறுக்கு தெருவைச் சேர்ந்த லியோதுரை, 25; மெடிக்கல் பில்லிங்கில் பணிபுரிகிறார். உழைப்பாளர் நகரைச் சேர்ந்த சீனிவாசன், 26; தனியார் நிறுவன ஊழியர். தமிழன், 25, காமராஜ் புரத்தைச் சேர்ந்த முகமது ரியாஸ், 23; துணிக்கடை ஊழியர். காந்தி நகரைச் சேர்ந்த பிரித்திவிராஜ், 28; பிளாஸ்டிக் கதவு கடை ஊழியரான ஐந்து பேர், இந்த மோசடியில் ஈடுபட்டது தெரிய வந்தது. போலீசார் ஐந்து பேரையும் கைது செய்து விசாரித்தனர்.

இதில், லியோதுரை மற்றும் முகமது ரியாஸ் மீது, பாளையங்கோட்டை காவல் நிலையத்தில் மோசடி வழக்கு உள்ளது.

சொகுசு வாழ்க்கை

இவர்கள் ஐந்து பேரும், தங்களது மொபைல் போனில் 'ஆன்லைன் டேட்டிங் ஆப்'பை கடந்தாண்டு பதிவிறக்கம் செய்துள்ளனர். செயலி முகப்பு படத்தில் பெண்ணின் புகைப்படத்தை வைத்துள்ளதோடு, பெண் பெயரையும் பதிவிட்டுள்ளனர். இவர்களை பெண் என நினைத்து, பல ஆண்கள் இவர்களுடன் 'சாட்டிங்' செய்துள்ளனர்.

இதில் நிர்வாணமாகவும், உடலின் அந்தரங்க அங்கங்களை காண்பிக்க, இவ்வளவு பணம் கொடுக்க வேண்டும் என பேசி, பலரிடம் பணம் பறித்துள்ளனர்.

அந்த வகையில், சபல புத்தியில் பலர் இவர்களிடம் பணத்தை இழந்துள்ளனர். ஒரு பெரும் தொகை அனுப்பிய பின், இவர்களை தொடர்பு கொள்ள முடியாத அளவிற்கு கில்லாடிகளாக செயல்பட்டுள்ளனர். பின், கிடைத்த பணத்தில் சொகுசு வாழ்க்கை வாழ்ந்து வந்துள்ளனர். தாமோதரகண்ணனிடம் தொடர்ந்து பணம் கேட்டு மிரட்டவே, வேறு வழியின்றி அவர் புகார் அளித்துள்ளார். புகாரின்படி விசாரிக்கையில், அவர்கள் போலீசில் சிக்கியது தெரியவந்தது.

போலீசார் ஐந்து பேரையும் கைது செய்து, எழும்பூர் 10வது பெருநகர குற்றவியல் நீதிமன்றத்தில் ஆஜர்படுத்தி சிறையில் அடைத்தனர்.