கனடாவின் டொரன்டோவில் 'கேண்டிடேட்ஸ்' செஸ் தொடர் நடக்கிறது. இந்தியாவின் பிரக்ஞானந்தா, விதித் சந்தோஷ் குஜ்ராத்தி, குகேஷ், அமெரிக்காவின் ஹிகாரு நகமுரா உள்ளிட்ட 8 பேர் பங்கேற்கின்றனர்.

இதன் 9வது சுற்றில் இந்தியாவின் விதித் சந்தோஷ், உலகின் 'நம்பர்-3' வீரர், அமெரிக்காவின் ஹிகாரு நகமுராவை எதிர்கொண்டார். இருவரும் மோதிய முதல் போட்டியில் விதித் வெற்றி பெற்றதால், இம்முறையும் நம்பிக்கையுடன் விளையாடினார். 27 வது நகர்த்தலில் நகமுரா செய்த தவறான நகர்த்தலை பயன்படுத்திக் கொண்ட விதித் சந்தோஷ், 36 வது நகர்த்தலில் வெற்றி பெற்றார்.

மற்றொரு போட்டியில் இந்திய வீரர்கள் பிரக்ஞானந்தா, குகேஷ் மோதினர். இதற்கு முன் மோதிய போட்டியில் தோற்ற பிரக்ஞானந்தா, இம்முறை கூடுதல் கவனத்துடன் விளையாடினார். இப்போட்டி 41 வது நகர்த்தலில் 'டிரா' ஆனது.

ஒன்பது சுற்று முடிவில் இந்தியாவின் குகேஷ் (5.5), ரஷ்யாவின் இயான் நெபோம்னியாட்சி (5.5) முதல் இரு இடத்தில் உள்ளனர். 5.0 புள்ளியுடன் பிரக்ஞானந்தா, இத்தொடரின் முதன் முறையாக மூன்றாவது இடத்துக்கு முன்னேறினார். நகமுரா (4.5), விதித் குஜ்ராத்தி (4.5) 4, 5வது இடத்தில் உள்ளனர்.

பெண்களுக்கான 9வது சுற்றில் இந்தியாவின் ஹம்பி, ரஷ்யாவின் கேத்தரினா மோதிய போட்டி 'டிரா' ஆனது. இந்தியாவின் வைஷாலி, சீன வீராங்கனை ஜோங்யிடம் தோல்வியடைந்தார். ஹம்பி (4.0) 6வது, வைஷாலி (2.5) 8வது இடத்தில் உள்ளனர்.