ஹாங்காங்கில் சர்வதேச ஓபன் பாட்மின்டன் தொடர் நடக்கிறது. ஆண்கள் இரட்டையர் காலிறுதியில் இந்தியாவின் சாத்விக்சாய்ராஜ், சிராக் ஜோடி, மலேசியாவின் ஆரிப் ஜுனைதி, ராய் கிங் யாப் ஜோடியை எதிர்கொண்டது.

முதல் செட்டை 21-14 என வென்ற இந்திய ஜோடி, அடுத்த செட்டை 20-22 என போராடி இழந்தது. மூன்றாவது, கடைசி செட்டை இந்திய ஜோடி 21-16 என வசப்படுத்தியது.

64 நிமிடம் நடந்த போட்டியின் முடிவில் இந்திய ஜோடி 21-14, 20-22, 21-16 என்ற செட் கணக்கில் போராடி வென்று, அரையிறுதிக்கு முன்னேறியது.

லக்சயா வெற்றி

ஆண்கள் ஒற்றையர் காலிறுதியில் இந்தியாவின் இளம் வீரர்கள் லக்சயா சென் 24, ('நம்பர்-20'), ஆயுஷ் ஷெட்டி 20, ('நம்பர்-31') பலப்பரீட்சை நடத்தினர். முதல் செட்டை லக்சயா 21-16 என கைப்பற்றினார். அடுத்த செட்டை ஆயுஷ் 21-17 என வசப்படுத்தினார். மூன்றாவது, கடைசி செட்டை லக்சயா (21-13) எளிதாக வென்றார்.

முடிவில் லக்சயா 21-16, 17-21, 21-13 என போராடி வென்று, அரையிறுதிக்கு முன்னேறினார்.