புதுச்சேரியில் புத்தாண்டை கொண்டாட ஆயிரக்கணக்கான சுற்றுலாப் பயணிகள் குவிந்துள்ளனர். புத்தாண்டையொட்டி, வழக்கமான நேரத்தை விட கூடுதலான நேரம் மது விற்பனை செய்ய கட்டணத்துடன் அனுமதி வழங்க கலால்துறை முடிவு செய்துள்ளது.

அதன்படி, எப்.எல். 1, 2 மது பார் அல்லாத சில்லறை விற்பனை நிலையங்கள் இன்று இரவு 11 முதல் 11:30 மணி வரை மது விற்பனை செய்ய 10 ஆயிரம் ரூபாய். பாருடன் கூடிய எப்.எல்.2 சில்லறை விற்பனை நிலையம் இரவு 11:00 முதல் நள்ளிரவு ஒரு மணி வரை மது விற்பனை செய்ய 20 ஆயிரம் ரூாபாய்.

எப்.எல். 2 சுற்றுலா மது விற்பனை பிரிவுக்கு நள்ளிரவு 12:00 முதல் 1:00 மணி வரை மது விற்பனை செய்ய 10 ஆயிரம் ரூபாய். இதர சிறப்பு நிகழ்ச்சிகளில் இரவு 11:00 மணி முதல் நள்ளிரவு 1:00 மணி வரை மது விற்பனை செய்ய 30 ஆயிரம் ரூபாய் என, கட்டணம் நிர்ணயிக்கப்பட்டுள்ளது.

கலால்துறையில் இதற்காக விண்ணப்பித்து கட்டணம் செலுத்தி அனுமதி பெற வேண்டும். அனுமதி பெறாமல் மது விற்பனை செய்யக்கூடாது என, கலால்துறை அறிவுறுத்தியுள்ளது.