நாகார்ஜூனாவிற்குள் இருக்கும் போன் ஹேக் பயம்

தெலுங்கு சினிமாவின் மூத்த மற்றும் முன்னணி நடிகர் நாகார்ஜூனா. தற்போது தனது 100வது படத்தில் நடிக்கிறார். ஐதராபாத்தில் தெலுங்கானா சைபர் பாதுகாப்பு தொடர்பான நிகழ்ச்சி ஒன்று நடந்தது. இதில் சிறப்பு விருந்தினராக இவர் பங்கேற்று பேசினார்.

நாகார்ஜூனா கூறுகையில், ‛‛என் செல்போனை ஹேக் செய்து விடுவார்களோ என்ற பயம் எனக்கு எப்போதும் உண்டு. அதனால் 15 நாட்களுக்குள் ஒருமுறை எனது பாஸ்வேர்டை மாற்றிக் கொண்டே இருப்பேன். இதேப்போல் வீட்டில் உள்ள வைபை பாஸ்வேர்டையும் மாற்றுவேன். காரணம் இதையும் ஹேக் செய்வார்கள் என்ற பயம் உள்ளது. எனது செல்போனில் எந்த போட்டோவும் எடுப்பதில்லை. ஒரு பிரபலமாக இருப்பதால் எல்லாவற்றிலும் கவனமாக இருக்க வேண்டியிருக்கிறது.

நான்கைந்து ஆண்டுகளுக்கு முன் வங்கி அதிகாரி பேசுவதாக என்னை அழைத்தார். பங்கு முதலீடு பற்றி பேசினார். வழக்கமாக, என் வங்கியின் தொடர்பு மேலாளர்தான் அழைப்பார், ஆனால் இது வேறு விதமான அழைப்பாக வந்தது. அதேசமயம் அவர் முதலீட்டை சந்தைப்படுத்துவதில் குறியாக இருந்தார். நான் இறுதிவரை சம்மதிக்கவில்லை. சுங்கத்துறையில் இருந்து பேசுவது போல் எல்லாம் எனக்கு அழைப்பு வந்தது. அதிர்ஷ்டவசமாக என் உறவினர் சைபர் குற்றப்பிரிவை அழைத்தார். இதுபோன்ற அழைப்புகளில் எப்போதும் எச்சரிக்கை உடன் இருக்க வேண்டும்'' என்றார்.